Festa e reivindicación no Día da Abella en Arzúa

Acompañados por un tempo despexado —que polo que comentan non é habitual na Festa do Queixo en Arzúa— celebramos no local da Asociación Galega de Apicultores no Centro do Queixo e do Mel, unha xornada festiva para celebrarmos a vitoria das abellas (e de todo o resto de seres que vivimos grazas ao seu incansable labor de polinización) fronte aos demenciais plans de fumigar centos de milleiros de hectares co praguicida tóxido flufenoxurón (nome comercial: Cascade).

As actividades comezaron ás 10 da mañá con obradoiros onde os nenos e nenas asistentes puideron fabricar as súas propias candeas con cera de abella ao tempo que se ofrecían degustacións de mel e queixo, e se puideron visitar as instalacións. A mañá tivo un colofón emotivo e vibrante coa música de Mini e Mero, as palabras reivindicativas da incansable loita a prol das abellas de Xesús Asorei, e as voces de Séchu Sende e Luz Fandiño que recitaron pasaxes das súas obras relacionados coas abellas e a loita social.

Durante o acto e nos momentos previos tamén se puideron ler nun ordenador ubicado no local e en páxinas impresas, numerosas mensaxes de apoio e saúdo tanto das recibidas nos momentos álxidos da loita social para determos as fumigacións con flufenoxurón, como referidas á propia festa que se celebraba. Así puideron estar connosco moitas persoas que por razóns de distancia non puideron acompañarnos fisicamente.

Momentos antes nunha xuntanza aberta da Plataforma contra as fumigacións, avanzouse de maneira importante na consolidación desta rede de colectivos galegos, que agora pasará a denominarse Por un futuro sen praguicidas (pois pesticidas é un anglicismo incorrecto xa que pest debe traducirse por praga en galego) e que terá a partir de agora responsables para diveras áreas de funcionamento e actuación. Nela falamos da loita mantida ata o de agora contra o praguicida que ameazaba de maneira masiva e inminente un punto crítico dos nosos ecosistemas, como son as abellas, e tamén da loita aínda en marcha por defender estes animais —os máis importantes do planeta— así como a sostibilidade da nosa agricultura en xeral, das ameazas tóxicas aínda presentes ao noso redor.

Agradecemos desde a Plataforma a asistencia ao público que desde diversos puntos de Galiza se desprazou ata Arzúa para desfrutar deste acto e ás organizacións participantes nesta xuntanza que marca o comezo dunha nova etapa na loita contra os biocidas no noso país.

En breve procederemos a reflectir as mudanzas desta nova etapa no noso web.

A continuación ofrecemos algunhas fotos do acto, tomadas polos membros da AGA:

Mini e Mero

Luz Fandiño con Mini e Mero

Público asistente ao Día da Abella

Luz Fandiño con Mini e Mero

[ACTUALIZACIÓN 07/03/2013] Engadimos máis fotos, esta vez tomadas pola xente da Casa do Mel, de As Pontes:

Día da Abella (Arzúa, 3 de marzo de 2013)

Xesús Asorey nos actos do Día da Abella (3 de marzo de 2013)

Público asistente aos actos do Día da Abella (3 de marzo de 2013)

Mini e Mero nos actos do Día da Abella (Arzúa, 3 de marzo de 2013)

Mini e Mero nos actos do Día da Abella (Arzúa, 3 de marzo de 2013)

Séchu Sende nos actos do Día da Abella (Arzúa, 3 de marzo de 2013)

#DiaDaAbella: O 3 de marzo celebraremos en Arzúa a vitoria das abellas sobre o praguicida «Cascade»

A Plataforma contra as fumigacións e por un futuro sen praguicidas ten o pracer de convidarvos a unha xornada festivo-reivindicativa cadrando coa Festa do Queixo do día 3 de marzo en Arzúa.

Celebraremos que as abellas galegas se libraron do praguicida tóxico Cascade (flufenoxurón) grazas ao apoio de cen mil persoas concienciadas e o labor da nosa Plataforma. Pero como aínda quedan outros velenos que ameazan as as abellas e os nosos ecosistemas, temos que continuar a loita na súa defensa… na nosa defensa! E este acto servirá tamén para consolidar a Plataforma, coñecer a moitas das persoas que apoiastes a loita contra o flufenoxurón a través de Internet e analizar as outras loitas aínda precisas.

O Día da Abella #DiaDaAbella

Lugar:

Centro do Queixo e do mel. Feira Nova (Arzúa). [Ver ónde está no OpenStreet Map]

Onde está o Centro do Queixo e do Mel, en Arzúa

Programa de actividades

A partir das 10:00 h:

  • Degustacións.
    Durante a xornada, haberá degustacións comentadas dos diferentes meles de Galicia, acompañados polo queixo de Arzúa.
  • Obradoiro de candeas para nenos e nenas.
    Teremos obradoiros de candeas de cera de abella nos que cada participante fará a súa propia candea e levará como recordo da visita ó Centro do Queixo e do Mel.

12:30-13:30 h: Voces polas abellas

Durante a xornada —que será aberta ao público— a nosa Plataforma tamén celebrará unha xuntanza de traballo (ás 11 h).

Agradecemos a difusión que deste acto poidades realizar tanto nas redes sociais de Internet como imprimindo e colocando o cartaz nos locais aos que teñades acceso.

Esperámosvos!

Cartaces para difusión

Cartaz A3

Día da Abella (#DiaDaAbella) 3 de marzo

Cartaz A4

Día da Abella (#DiaDaAbella) 3 de marzo

Cartaz para webs

Día da Abella (#DiaDaAbella) 3 de marzo

A presión social consegue que a Xunta desautorice as fumigacións aéreas co pesticida Cascade

VITORIA!!! Detivemos as fumigacións asasinas!!Dabamos conta neste mesmo blog hai uns días da comunicación que nos enviara o Valedor do Pobo, achegándonos unha información que a Xunta de Galicia agochara. Onte enviamos aos medios galegos a seguinte o seguinte comunicado de prensa avaliando esa información, que demostra que a Plataforma logrou o seu obxectivo e que o sentido común (e a Lei) impuxéronse sobre os intereses económicos por tras destas perigosas fumigacións.

(Traducción al castellano, más abajo.)

Seguir lendo

Resposta do Valedor do Pobo á Plataforma contra as fumigacións

Reproducimos a resposta do Valedor do Pobo logo de esta institución ter feito xestións coas consellarías competentes pola súa negativa a facilitaren información acerca das fumigacións con flufenoxurón.

Salientamos da resposta un dato fundamental: Finalmente a Xunta de Galicia non deu autorización á prevista fumigación aérea, desentenséndose das outras que se puidesen facer desde terra.

A continuación extraemos un fragmento do documento do Valedor no que se reproduce a contestación que lles deu a Xunta (en concreto a Secretaría Xeral de Montes e Medio Rural) en data non precisada pero posterior en todo caso ao 12/09/2012 e anterior ao 28/11/2012. Salientamos nós en negriña a confirmación de que, como reclamaba a nosa plataforma, eran ilegais os tratamentos aéreos:

Asunto: fumigacións de eucaliptus – petición do valedor do pobo C.6Q/2093/12

Recibida a petición do valedor do pobo comunicación con data 10-09-2012 n.0 R.E. 136393 relacionada cos tratamentos co produtos fitosanitario cascade composto pola materia activa Flufenoxuron relacionada cos tratamentos para o control da praga do gorgullo do eucalipto Gonpiterus scutellatus Gyllenhal infórmase que:

1- O formulado comercial Cascade (Flufenoxuron10%[DC] PÁX./V) está autorizado na actualidade en España para tratamentos en pulverización a ultrabaixo volume contra Gonipterus. A data de caducidade do produto no Rexistro de Produtos Fitosanitarios do Ministerio de Agricultura, Alimentación e Medio ambiente é o 31-12-2011, o límite de venda é ata o 30-06-2012 e a data de emprego polos silvicultores é de ata o 30 de decembro de 2012.

2- Na ficha do Produto do Ministerio figura como pouco perigoso para as abellas.

3- A Consellería do Medio rural e do Mar non comunicou a particulares nin a institucións a obrigatoriedade do tratamento contra o gorgullo do eucalipto nin instou a que as masas de eucaliptus fosen tratados (sic).

4- A Consellería de Medio Rural e do Mar resolveu desfavorablemente a petición de aplicación de tratamentos aéreos contra o gonipterus con cascade por parte dunha empresa do sector, logo de solicitados os pertinentes informes dado que ao seu xuízo non se xuntaban os condicionantes previstos na directiva 128/2009/CE para este tipo de tratamentos.

5- É posible que fosen dados de maneira puntual tratamentos contra os gonipterus con cascade desde terra mediante equipos de aplicación de produtos fitosanitarios de gran alcance, no (sic) obstante estes tratamentos non están suxeitos a unha autorización específica por parte da autoridade competente de Galicia (como sucede cos tratamentos aéreos) e poden realizarse sempre que a persoa ou empresa responsable que o aplique estea en posesión do carné de aplicador de produtos fitosanitarios correspondente (básico ou cualificado) e os tratamentos se fagan consonte ao autorizado no rexistro (dose, praga, hospedante, sistema de aplicación, medidas de seguridade e de protección do ambiente, etc) e a normativa vixente cuxa última lexislación publicada é o RD 1311/2012 de 14 de setembro, pola que se establece (sic) o marco de actuación para conseguir un uso sostible dos produtos fitosanitarios, cuxo cumprimento se controla pola inspección oficial de sanidade vexetal, no (sic) detectándose ata o de agora incumprimentos neste asunto.

O Valedor indica na súa carta que o feito de a Consellería non responder en prazo legal á demanda de información presentada pola Plataforma será obxecto dun informe crítico que o Valedor presentará proximamente no Parlamento de Galiza.

A Plataforma contra as Fumigacións – por un futuro sen pesticidas emitirá en breve un comunicado avaliando a información obtida polo Valedor do Pobo.

Descargar a resposta do Valedor do Pobo (en PDF).

A fiscalía de medioambiente arquiva a denuncia da Plataforma contra as Fumigacións

Con data do 1 de outubro o fiscal delegado de medioambiente comunicou aos representantes da Plataforma contra as Fumigacións, en relación á denuncia que presentáramos en abril, o seguinte:

no se van a iniciar acciones de clase alguna al no estimar de los antecedentes suministrados la existencia de delito alguno

A Fiscalía informa de que solicitou información sobre as fumigacións á Consellaría de Medio Rural e Mariño, concretamente á Subdirección Xeral de Recursos Forestais. Desde a Xunta contestáronlles o día 11 de xuño que «no existe aprobado plan de aplicación aérea del citado producto [o flufenoxurón], que se usa la lucha biológica contra dicha plaga, que la ejecución del citado plan no tiene naturaleza pública, y que su utilización privada y aérea está sujeta a control de la administración».

O cal podemos interpretar como que:

  1. O plan existe, aínda que eles non o tiñan aprobado (na data de xuño en que contestaron).
  2. Recoñecen que se simultanea loita biolóxica e loita química.
  3. Que eles teñen que controlar as fumigacións aéreas.

Tamén di a Fiscalia que consultou co Instituto español de Toxicoloxía e coa Facultade de Farmacia, «en los [???] que se advierten los riesgos detectados en la documentación de las instituciones comunitarias». Aínda que a redacción deste punto no comunicado da fiscalía é confusa, entendemos que estas institucións confirmaron a toxicidade para as persoas e o medio natural.

Malia o contestado pola Xunta, conclúe a Fiscalía: «No habiendo planes específicos como los denunciados, siendo así informados por la administración, procede el archivo de las presentes al no concretarse el riesgo derivado de la utilización del producto». (A negriña é nosa.)

A Fiscalía interpreta que a Xunta di que non hai plans de fumigar, aínda que pola contestación (tal e como a trasmite a Fiscalía) pode entenderse que o din é que o plan existe pero non é da Xunta, senón de ASPAPEL. Resulta sorprendente que non requerisen información desta organización para verificar se o plan existía, aínda que fose privado.

De todos xeitos, desde a Plataforma contra as Fumigacións queremos facer notar que a non apreciación de delicto (penal) por parte do Fiscal non supón que non o haxa (administrativo, ecolóxico…). Tamén lembramos que está aínda pendente a queixa que admitíu o Valedor do Pobo e que pode dar pé a ulteriores accións xudiciais, mesmo penais.

O que non detivo a Fiscalía foi impedido pola contestación social e polas accións, mobilizacións e denuncias desta Plataforma que lograron atrancar, diminuir ou evitar a masiva e silandeira fumigación que tiñan previso realizar en todo o país.

Eleccións e fumigacións: Que partidos galegos prometen parar as fumigacións?

Fumigacións NON! Tamén nas eleccións ao parlamento galego!Reproducimos o resultado dun cuestionario que foi enviado aos partidos galegos que concorren ás eleccións do 21 de outubro en Galiza e que foi publicado no blog de Casdeiro, promotor da recollida de sinaturas online en contra do plan fumigatorio de Aspapel e os seus compinches.

A pregunta

1) Que medidas vai tomar o voso partido ou coalición, se alcanza responsabilidades de goberno, para impedir as fumigacións co pesticida Cascade en Galicia.

2) Que outras medidas relativas ao uso de pesticidas químicos pensades poñer en marcha se gobernades na Xunta, en especial as relativas a pesticidas tóxicos para as abellas e outros insectos polinizadores.

Seguir lendo

Todo pola pasta (de papel)!

(Versión extendida dun artigo de Casdeiro publicado na sección Altermundo do número de setembro da revista Tempos Novos. Ao artigo, escrito no 15/08/2012 engadíronselle ligazóns nesta versión online para quen quixer ampliar información, e máis algunhas notas ao pé.)

A industria papeleira española segue adiante cos seus plans de fumigar masivamente Galiza cun pesticida declarado tóxico pola UE.

Para salvar os eucaliptos, sacrificar as abellas; e con elas non só o medio de vida de milleiros de apicultores senón un elemento chave dos nosos ecosistemas que permite a polinización de numerosas plantas incluídas moitas das que nos alimentamos. Ese é o plan que xorde a comezos deste ano no seo de ASPAPEL (Asociación Española de Fabricantes de Pasta, Papel y Cartón), entidade presidida por ENCE, e que comeza a poñerse en marcha en primavera coa colaboración da Xunta de Galicia, asociacións forestais galegas, determinados concellos gobernados polo PP e técnicos do centro de investigación de Areeiro. O monocultivo do eucalipto en Galiza áchase afectado por unha praga (algo ao que son sumamente proclives os monocultivos) dun insecto chamado Gonipterus scutellatus, comunmente coñecido como gorgullo do eucalipto. Malia existiren outras vías menos daniñas para o combater, como a loita biolóxica, a industria papeleira opta por empregar un insecticida da casa BASF chamado comercialmente Cascade, e cuxo principio activo é o flufenoxurón. O abriante do caso é que, contravindo a normativa europea, elíxese facer por medio de fumigacións aéreas (que esparexen o produto mesmo fóra das zonas afectadas) e sobre todo que o feito de que a propia UE decideu proibir a súa fabricación, comercialización e uso por ser demasiado daniño para o medio ambiente. Porén, alguén debeu pensar que había que colocar os stocks do Cascade antes de que entrase en vigor a proibición e todo apunta a que elexiron Galiza como o país que ía apandar.

Seguir lendo

Fai que o teu concello se mova contra as fumigacións

Desde a Plataforma contras as fumigacións queremos informar a todos os concellos e queremos tamén que se posicionen en defensa dos seus veciños e veciñas, prantándolle cara á patronal do papel e á Xunta de Galicia.

Queremos extender a todos os concellos galegos unha proposta que xa tivo éxito nalgúns concellos coma Ribadeo, Oleiros, Narón ou Vilaboa, que se posicionan contra as fumigacións, na defensa da seguridade da súa comunidade, do seu medio e por unha política forestal máis respectuosa e sustentable.

A nosa acción require da vosa colaboración para entregar en todos os concellos, de xeito coordinado, unha moción para que sexa debatida no próximo pleno do voso concello, en contra das fumigacións con Cascade.

Trátase de entregar dous documentos, que poñemos á vosa disposición, no rexistro do voso concello, á atención da alcaldía do mesmo, e procurar facer un seguimento do que se discuta no pleno.

Resultados das mocións presentadas

KML-LogoFullscreen-LogoQR-code-logoGeoJSON-LogoGeoRSS-LogoWikitude-Logo
Mapa Acción-Moción

cargando mapa - por favor, espere...

Moción Valdoviño: 43.605753, -8.144302
Mocion Melide: 42.913818, -8.015556
Moción Santiso: 42.856840, -8.042336
Moción Toques: 42.943606, -7.968864
Moción Marín: 42.391009, -8.702545
Moción Ribadeo: 43.538096, -7.049103
Moción Narón: 43.507725, -8.187561
Moción Vilaboa: 42.347000, -8.650188
Moción Tui: 42.046743, -8.644867
Moción Ares: 43.424999, -8.246613
Moción Redondela: 42.287977, -8.608818
Moción Mondoñedo: 43.428739, -7.364445
Moción Oleiros: 43.332920, -8.348236
Moción Ames: 42.907909, -8.617401
Moción Irixoa: 43.284641, -8.066111
Moción Paderne: 43.286078, -8.172112

Os documentos

A Moción: Este documento contén unha exposición da problemática das fumigacións con flufenoxurón e unha explicacións dos motivos polos que nos posicionamos en contra dos mesmos. Finalmente insta ao concello a facer unha declaración institucional onde adopta os seguintes acordos:

  • Non permitir as fumigacións aéreas con Cascade no seu término municipal
  • Instar á Xunta a que non autorice as fumigacións
  • Fomentar unha xestión forestal sostible

Os diferentes grupos políticos deben ser informados desta moción e por iniciativa dalgún deles podería ser discutida no pleno. Por isto é importante que, se podedes contactar con representantes dalgún partido político con representación no pleno lles informedes desta campaña, solicitando o seu apoio á moción.

A instancia: A instancia é un documento que achegamos á moción cando o entregamos no rexistro do concello para informar de que estamos a entregar unha moción que queremos que sexa trasladada aos diferentes grupos políticos no governo municipal.

Manual: como entregar a moción no teu concello

  • Descarga os modelos de instancia e moción
  • Cubre os datos da instancia e da moción cos teus datos e cos do teu concello e imprime os documentos
  • Diríxete ao teu concello e fai entrega, no rexistro, dos dous documentos: instancia + moción
  • Consulta e toma nota da data de celebración do próximo pleno
  • Pregunta como podes informarte do resultado do próximo pleno
  • Contacta cos grupos políticos e busca o compromiso dalgún deles para propoñer e apoiar a moción
  • Informa a través da web da Plataforma da entrega da documentación (podes facelo con un comentario nesta entrada)

Planificación da acción

Até o día 20 de xullo buscaranse voluntarios e voluntarias que queiran colaborar entregando mocións nos seus concellos ou nos das súas proximidades. Na seguinte semana, a partir do día 23, realizarase a entrega das mocións.

Documentos

Fumigacións de fincas agrarias: “efectos colaterais”

Desde o Sindicato Labrego Galego chéganos un comunicado de prensa sobre o impacto das fumigacións contra o gorgullo en fincas agrarias próximas aos eucaliptais.

Reproducimos íntegro o contido da nota de prensa:

Indignación no lugar de Painceira, en Cerdido, polo impacto tóxico das fumigacións en fincas agrarias lindeiras cos eucaliptais sulfatados

A veciñanza do lugar de Painceira, parroquia de Barqueira, no coruñés concello de Cerdido, está indignada ao ser sulfatadas as súas fincas agrarias como efecto colateral das fumigacións con canóns en plantíos de eucaliptos lindeiros. As condicións meteorolóxicas de hoxe, con vento intenso, fixeron que os pesticidas se esparexesen por prados nos que se cultiva herba que está a piques de ser recollida e por leiras de patacas. O máis grave é que este pesticida altamente tóxico puido chegar até as casas habitadas da zona.

Aínda que non o puidemos confirmar, o máis probable é que estas fumigacións, que en Cerdido están a ser feitas por unha empresa portuguesa, se inclúan dentro da campaña de erradicación do gorgullo do eucalipto co insecticida Cascade, que ten por principio activo o Flufenoxuron, e cuxa comercialización será prohibida o 1 de agosto en toda a Unión Europea pola súa perigosidade. O Flufenoxuron está considerado como altamente tóxico para as persoas, a fauna (especialmente as abellas) e o medio ambiente (especialmente os cursos de auga), razóns polas que non poderá ser empregado máis alá do 31 de decembro. A pesar disto, a Xunta e a Asociación Española de Fabricantes de Pasta, Papel e Cartón (ASPAPEL) pretenden levar a cabo unha campaña de fumigacións aéreas con este produto, que recoñece, na súa propia ficha técnica, ser tóxico para as larvas das abellas, co que iso supón, non so para as colmeas, senón para a agricultura e a natureza en xeral, polo papel fundamental destes insectos nos procesos de polinización.

Dende o Sindicato Labrego Galego esiximos, tanto á Xunta como aos concellos afectados, que ordenen o cese inmediato de toda esta campaña de fumigacións que, como no caso de Painceira, está a afectar de xeito directo non só ao medio ambiente polo impacto tóxico do Flufenoxuron, senón que tamén se están vendo seriamente afectadas as actividades agrogandeiras da zona e mesmo as persoas que viven nas inmediacións.

 

 

Palestra sobre as fumigacións en Ferrol

Cartaz Palestra FerrolEste venres, 15 de xuño, ás 20,00h, no Museo da Sociedade Galega de Historia Natural de Ferrol celebrarase unha Palestra sobre as Fumigacións.

Contarase coa participación de Andrés Lamas Seco (biólogo) , Segundo Ruiz Lemos (Técnico Forestal) e Manuel Ferreira Rodríguez (Abelleiro).